Pangunahan sa Oro-Trade and Investment Promotions Center (Oro-TIPC), Kagay-an Misamis (KAMI) Creative Council, ug sa Department of Trade and Industry (DTI) Misamis Oriental ang mga kalihokan alang sa ‘Bulawanong Bahandi 2026’ nga pamaagi sa pagsaulog sa Philippine Creative Industries Month karong bulan sa Setyembre.
Daghang mga aktibidad ang nakahan-ay alang sa tanang Kagay-anon labi na ang anaa sa creative industries o mga artist. Gawas nga mapakita ang mga obra sa mga Kagay-anon artist, kahigayunan sab kini aron nga makaapil sila og libreng mga workshops gikan Septiyembre 17-18 diha sa Divisoria.
Lakip sa mga itanyag nga sesyon ang Terracotta Sculpture, Pot Painting, Drawing and Coloring, Painting, Podcasting, Hosting and Voiceover 101, Publishing and Printed Media, lakip na ang pagpasundayag og mga pelikula ug poetry night.
Sumala pa ni Ms Raelita Legaspi, Assistant Department Manager sa Oro-TIPC ug Chairperson sa Bulawanong Bahandi 2026 Management Committee nga kini nga selebrasyon langkuban sa siyam sa creative domains.
Gawas sa mapasundayag ang talento ug obra sa mga Kagay-anon, dakong tabang sab kini nga ma-market ang ilahang mga gama ug mahimong source of income.
Photo courtesy: Oro-TIPC
