Gikonsidera sa Police Regional Office 10 o PRO-10 nga malampuson ang ilang buluhaton sa paghatag og seguridad atol sa bag-ohay lang nga BARMM Parliamentary Elections.
Matud ni Police Major Joan Navarro, spokesperson sa PRO-10, luwas ug accounted for ang tanang 901 ka personnel nga gipakatap sa nagkalain-laing police stations sa Lanao del Sur.
Hangtod alas-2:30 sa hapon niadtong Septiyembre 15, anaa gihapon sa ilang tagsa-tagsa ka area of assignment ang mga personnel ug padayon nga gi-monitor sa regional office.
Kahinumduman nga gipakatap ang mga kapulisan sa nagkalain-laing lungsod ug police stations sa Lanao del Sur aron motabang isip security forces ug Special Electoral Boards atol sa eleksyon.
Samtang, gihangyo sa PRO-10 ang mga pamilya ug publiko nga ipadayon ang pag-ampo alang sa kaluwasan sa mga personnel nga nagpabiling naka-duty ug layo sa ilang mga pamilya.
Padayon usab ang police presence ug monitoring sa lugar aron masiguro ang kalinaw, kahapsay ug seguridad human sa electoral exercise.
Photo courtesy: PNP Police Regional Office 10
