Nakabawi si Boholano boxing pride Regie “The Filipino Phenom” Suganob human niya gi-knockout sa ikalimang round si kanhing 2 time world champion Sivenathi “The Special One” Nontshinga sa ilang IBF world title eliminator.
Nahimo kining main event sa “Kumong Bol-Anon 26” diin nakabawi si Suganob sa iyang unang professional defeat batok kang Nontshinga niadtong 2023.
Matod ni Suganob, nakabantay siya nga napugos na si Nontshinga sa pagbag-o sa iyang pamaagi human sa padayong body shots nga nagpahinay sa lihok sa South African. Imbis gukdon ang iyang kontra, iyang gipugngan ang iyang direksiyon ug gisundan og mga kombinasyon.
Miangkon si Suganob nga hapit siya mapasmo sa iyang kagana nga makapa-knockout sayo sa away human siya mapukan sa third round. Apan misunod siya sa tambag sa iyang mga coach nga magpabiling kalmado ug maghulat sa saktong higayon.
Tungod sa kadaogan, misaka ang iyang rekord ngadto sa 19-1, walo ka knockout, ug nakakuha siya og higayon alang sa laing world title shot.
Photo Courtesy: Tapology
