Dili moubos sa 24 ka tawo ang namatay sa dakong sunog nga misulong sa Bukavu, Democratic Republic of Congo. Matud sa report, 19 ka babaye ug lima ka lalaki ang lakip sa mga namatay sa insidente. Naabo usab ang duha ka eskwelahan ug kapin-kulang 300 ka balay nga hinimo sa kahoy.
Gikumpirma sa administrasyon sa AFC/M23 rebels nga 29 ka tawo ang nasamdan ug padayon pang giimbestigahan ang posibleng hinungdan sa sunog. Samtang, 29 ka pasyente ang padayon nga gitambalan sa mga health facility, diin 21 kanila anaa sa intensive care unit o ICU.
Gipasidan-an usab sa mga residente ug health worker nga posible pang mosaka ang ihap sa mga namatay tungod sa kaseryoso sa mga samad sa pipila ka biktima. Dugang pa nga ang Bukavu anaa sa kontrol sa Rwanda-backed AFC/M23, human kini mapasakamot sa grupo niadtong unang bahin sa miaging tuig.
Photo Courtesy: Xinhua
