Gipadayag sa 403rd Infantry Peacemaker Brigade Philippine Army nga dili na makahimo og dagkong armadong operasyon ang mga nahibiling miyembro sa New People’s Army (NPA) nga kaniadto naglihok sa Bukidnon taliwala sa padayong subsob nga operasyon sa militar.
Sumala ni Brigade Commander Brig. Gen. Siegfred C. Tubalado sa usa ka press conference, nahimo kini nga obserbasyon human sa sunod-sunod nga engkwentro sa Barangay Bakingking, Esperanza, Agusan del Sur niadtong Setyembre 12, 2026.
Dugang pa ni Tubalado, nga kung ma-neutralize ang mga nahibilin pinaagi sa pagsurender o sa militar nga operasyon, posible nang opisyal nga ideklarar ang Bukidnon isip insurgency-free province. Bisan pa man nga adunay pipila nga naglihok pa sa utlanan sa Misamis Oriental, giingong limitado na kaayo ang ilang kapasidad sa paghimo og kagubot.
Kahinumdumang dakong kapildihan ang gidangatan sa North Central Mindanao Regional Committee (NCMRC) sa New People’s Army human mapatay ang ilang Secretary nga si Julia M. Cagadas (alyas “Rheda/Toyang”) kauban ang tulo pa ka myembro sa nahitabong sunod-sunod nga engkwentro batok sa mga tropa sa 403rd Infantry Brigade nga nakabase syudad sa Malaybalay didto sa kagubatan sa Barangay Bakingking, Esperanza, Agusan del Sur niadtong Sabado Septiyembre 12, 2026. Gawas sa upat nga napatay nga nailhang silang Jonny Almonte Lindayo (alyas “KIKOY”), Rochamea Bihag (alyas “MAKI”), ug Gerald Basacon (alyas “DOYDOY”), tulo usab ka opisyal ug myembro sa grupo ang pormal nga nagsurender sa mga militar samtang unom ka tag-as nga kalibre sa armas ang nakumpiskar sa dapit.
Sa kasamtangan, padayon ang hugot nga pagmonitor sa militar samtang giandam ang tanang kinahanglanon alang sa maong makasaysayanong deklarasyon sa kalinaw sa probinsya
Photo Courtesy: 403rd Infantry Peacemaker Brigade Philippine Army
