Mikunhod sa 80 porsyento ang gidaghanon sa mga single sa Japan nga adunay interes nga magminyo sa umaabot, sumala sa bag-ong survey sa National Institute of Population and Social Security Research.
Sa mga single nag-edad og 18 hangtod 34, 75.1 porsyento sa mga lalaki ug 77.8 porsyento sa mga babaye ang nag-ingon nga plano nilang magminyo. Parehong mikunhod kini og kapin unom ka porsyento kumpara sa miaging survey niadtong 2021.
Misaka usab sa 24 porsyento ang mga lalaki ug 21.5 porsyento ang mga babaye nga miingon nga dili na sila magminyo, samtang misaka usab ang gidaghanon sa mga wala makakita og benepisyo sa kaminyoon.
Sumala sa mga eksperto, nalambigit sa maong pagkunhod ang nag-uswag nga pagtuo sa pipila ka Hapon nga dili sila mobati og kamingaw bisan mag-inusara, ingon man ang pagkunhod sa ilang interaksiyon sa mga gagmayng bata.
Sa laing bahin, sa mga bag-ong minyo nga wala pay lima ka tuig ang kaminyoon, misaka usab ang gidaghanon sa mga nagkaila pinaagi sa internet ngadto sa hapit 20 porsyento—doble kumpara sa miaging survey.
Gipakita usab sa survey nga 2.18 ang kasagarang gidaghanon sa mga anak nga ilang giingon nga ilang gusto, samtang kapin usa sa matag upat ka magtiayon ang nakaagi na og fertility testing o treatment.
Photo Courtesy: PNA
