Gipasiugda ni Gingoog City Mayor Eric Cañosa ang kamahinungdanon sa matinud-anon, responsable ug dekalidad nga serbisyo publiko atol sa padayong selebrasyon sa Civil Service Month sa siyudad. Sa iyang mensahe, gipahinungod sa mayor ang prinsipyo nga “Public Office is a Public Trust,” nga nag-awhag sa tanang kawani sa gobyerno nga magserbisyo uban ang integridad, propesyunalismo ug tulubagon.
Gipasiugda usab ni Cañosa ang tumong nga ang panggobyerno mahimong mas duol sa katawhan pinaagi sa paggiya, pagtabang ug paghatag og hustong serbisyo sa mga lungsoranon nga moduol sa ilang mga buhatan alang sa ilang mga panginahanglan.
Matud pa sa mayor, ang serbisyo publiko dili lamang kutob sa walo ka oras nga trabaho, gikan Lunes hangtod Biyernes. Labaw pa niini, ang pagka-kawani sa gobyerno naglakip sa padayong pagserbisyo ug pag-atiman sa kaayohan sa katawhan.
Nagpahayag usab si Mayor Cañosa sa iyang pagpasalamat sa tanang empleyado sa City Government of Gingoog tungod sa ilang padayong paningkamot sa paghatag og kalidad nga serbisyo sa publiko.
Gipasiugda niya nga ang matag serbisyo kinahanglan nga mapaluyohan sa integridad, propesyunalismo ug accountability aron mapalig-on ang pagsalig sa katawhan ngadto sa lokal nga panggobyerno.
Kabahin usab sa mga programa sa siyudad ang Moral Values Reintegration Program, nga gitumong sa pagpalig-on sa moral nga mga prinsipyo ug maayong pamatasan sa mga kawani
Pinaagi sa mga programa ug inisyatibo, padayong gipasiugda sa administrasyon ni Mayor Cañosa ang usa ka panggobyernong mas matinud-anon, episyente ug mas duol sa katawhan.
Photo courtesy: Gingoog City Information Office
