Misaka na sa 35 ang ihap sa mga namatay sa makalilisang nga sunog sa ferry nga M/V June Aster sa kadagatan duol sa Coron, Palawan. Sumala sa Philippine Coast Guard, 43 ang nakaluwas, samtang 53 ka mga pasahero ug tripulante ang padayon pang gipangita.
Gikumpirma sa PCG nga duha ka mga tawo nga nalista sa manifest sa barko ang wala diay makasakay, hinungdan nga na-adjust ang ihap sa mga missing.
Human mapalong ang kalayo kagahapon, Biyernes, nakit-an sa mga awtoridad ang mga nasunog nga mga patayng lawas sulod sa economy accommodation area sa barko.
Gipadayon sa Coast Guard, PNP-Scene of the Crime Operations ug uban pang ahensya ang retrieval ug identification sa mga biktima.
Samtang, nagpabilin pang imbestigasyon ang hinungdan sa sunog nga unang misugod human gi-report sa mga survivors ang kusog nga pagbuto, gisundan sa aso ug kalayo.
Gipakatap usab ang mga oil spill boom isip precautionary measure, bisan pa nga walay nakita nga oil sheen sa palibot nga katubigan.
