Gipatin-aw sa Zamboanga del Sur Police Provincial Office (ZSPPO) ang kahulugan sa pagdeklarar og “zero crime rate” sa 8 Focus Crimes sulod sa usa ka adlaw.
Matud ni ZSPPO Provincial Director PCol. Bonifacio Arañas Jr. ang maong deklarasyon dili pasabot nga hingpit nang walay krimen nga nahitabo sa usa ka partikular nga adlaw, kundili nagpasabot lamang nga walay natalang insidente nga sakop sa gitawag nga 8 Focus Crimes nga gitutukan sa kapulisan.
Segun ni Arañas, ang 8 focus crime nga ilang gimonitor mao ang mga kaso sa murder, homicide, physical injury, rape, robbery, theft, carnapping sa mga sakyanan ug motorsiklo.
Dugang niya, posible gihapon nga adunay ubang klase sa insidente o paglapas sa balaod nga naitala sa Barangay Level, apan walay kaso nga nahisakop sa maong 8 Focus Crimes.
Gipasiugda sab ni Arañas nga importante nga husto ang pagsabot sa publiko sa crime statistics aron malikayan ang sayop nga interpretasyon sa deklarasyon nga “zero crime rate nga matala sa probinsya.
