Gitutokan sa Department of Energy (DOE) ang 369 ka mga lugar sa 23 ka probinsya nga kulang pa ang serbisyo sa kuryente, para posibleng maapil sa umaabot nga microgrid auction. Kapin sa 101,000 ka panimalay, o eksaktong 101,468 households, ang sakop sa inisyal nga listahan.
Lakip sa mga lugar ang Zamboanga del Sur, ingon man ang Basilan, Bohol, Cebu, Lanao del Sur, Palawan, Sulu, Tawi-Tawi ug ubang probinsya. Matud sa DOE, inisyal pa lamang ang maong listahan ug mahimo pa kining mausab human sa validation ug dugang nga technical assessment.
Tumong sa ahensya nga hatagan og panahon ang mga microgrid service providers sa pag-andam sa ilang mga plano ug teknikal nga pagtuon alang sa umaabot nga competitive selection process.
Matud ni Energy Secretary Sharon Garin, pinaagi sa microgrid development mahimong mas barato ang kuryente ngadto sa mga komunidad nga wala pa maserbisyohan. Giandam usab sa DOE ang ikaduhang hugna sa assessment alang sa dugang 15 hangtod 25 nga mga nagkadaiyang lugar sa nasud.
Photo Courtesy: Philippine News Agency
