Magsilbing nag-unang highlight sa mismong adlaw sa pagsaulog sa ika-74 nga Adlaw sa Zamboanga del Sur ang Most Outstanding Zambosurian Awarding Ceremony nga pagahimoon sa Septyembre 17, 2026. Matud ni Zamboanga del Sur Provincial Information Officer Teodorico Guirnaldo Jr, niining adlawa pagapasidunggan ang mga Zambosurian nga nagpakita og talagsaong kontribusyon, kalampusan ug serbisyo nga nakahatag og dungog ug positibong imahe sa probinsya sa tuig 2026.
Segun ni PIO Guirnaldo, ang maong awarding ceremony usa usab ka paagi sa provincial government sa pag-ila sa mga indibidwal nga nagsilbing inspirasyon ug nakatampo sa kalamboan sa tibuok Zamboanga del Sur.
Gilauman nga mahimong higayon kini sa pagpasalamat ug paghatag og pag-ila sa mga outstanding Zambosurian nga nagpadayon sa pagrepresentar sa probinsya pinaagi sa ilang mga nahimo ug serbisyo.
Kabahin kini sa nagkalain-laing kalihukan alang sa ika-74 nga Adlaw sa Zamboanga del Sur, nga nagtumong sa pagselebrar sa mga kalampusan probinsya sulod sa pipila ka mga katuigan.
