Gikumpirma sa Bureau of Immigration kun BI nga mibiya sa nasud sila si Senate Minority Leader Alan Peter Cayetano ug ang iyang igsoon nga si Senador Pia Cayetano, diin gikatahong nakit-ang misakay og eroplano paingon sa Singapore ug miabot sa Changi Airport.
Sumala sa ahensya nga base sa ilang mga rekord, walay hold departure order ang duha ka senador panahon sa ilang paggawas sa nasud. Kahinumdoman nga gimandoan sa Office of the Ombudsman si Alan Cayetano, kauban si Senador Robin Padilla, nga motubag sa mga kaso sa giingong obstruction of justice tungod sa alegasyon nga mitabang sila kang Senador Ronald “Bato” dela Rosa sa pag-ikyas.
Kalabot niini, nakakuha usab ang Ombudsman og mga dokumento ug ebidensya gikan kang Senador Panfilo Lacson kalabot sa mga giingong ghost infrastructure projects ug reclamation projects sa Taguig, diin giingong adunay mga proyekto nga naapil ang pangalan ni Cayetano.
Samtang, gipaklaro usab ni Senate President Sherwin Gatchalian ug Senate President Pro Tempore Vicente “Tito” Sotto nga ang personal nga pagbiyahe sa mga senador gawas sa nasud dili na magkinahanglan pa og pagtugot gikan sa Senado.
Photo Courtesy:FB page of Atty. Jesus Falcis
