Gibutyag sa militar sa Thailand nga posibleng nahitabo ang illegal nga pagbaligya sa mga organo sa usa ka scam compound duol sa utlanan sa Thailand ug Cambodia. Sumala sa militar, ang mga miyembro sa scam group nga napakyas sa pagkab-ot sa ilang scam quotas posibleng gipugos sa paghatag sa ilang mga organo isip silot.
Gitugotan niadtong Lunes ang mga miyembro sa media ug ASEAN Observer Team nga makasulod sa compound sa Chong Chom area sa Surin province. Nakaplagan ang usa ka lawak nga adunay operating table ug surgical equipment, nga gituohang mahimong gigamit sa pagkuha og organo, samtang adunay mga selda alang sa solitary confinement nga adunay timailhan nga kaniadto adunay surveillance cameras.
Sumala pa sa militar, adunay mga dokumento nga nakit-an nga naghisgot sa “organ trafficking,” samtang adunay mga timailhan usab sa pagpahigayon og medical tests alang sa sexually transmitted diseases.
Ang compound, nga kaniadto usa ka hotel resort, gituohang gihimong scam center panahon sa COVID-19 pandemic ug adunay kapin 150 ka mga building sa 810,000 square meters nga lugar. Samtang gibanabana nga anaa sa 15,000 ka indibidwal ang nalambigit sa scam operations sa maong lugar , lakip ang mga langyaw.
Photo courtesy: PNA
