Padayon pa sa ilang makuting imbestigasyon ang kapulisan sa Siocon Municipal Police Station may kalabutan sa nahitabong pagpusil patay sa duha ka mga indibidwal didto sa Barangay Siay, lungsod sa Siocon, Zamboanga del Norte kapin kon kulang alas 7:45 sa buntag kagahapong adlawa, Septyembre 9.
Giila ang duha ka mga biktima nga pulos mga mag-uuma ug residente sa maong lungsod. Subay sa inisyal nga imbestigasyon sa kapulisan, nagsakay ang duha sa motorsiklo dihang kalit kining gipamusil duha ka wala mailang mamumuno nga nagsakay sa pula nga skygo nga motorsiklo nga walay plate number.
Nakaangkon ang mga biktima ug daghang mga samad pinusilan sa nagkadaiyang parte sa kalawasan ug gideklarang dead-on-arrival sa Constantino Soriano Sr District Hospital.
Human sa pagpamusil, dali usab nga misibat ang mga suspetsado padulong sa Barangay Pisawak sa maong lungsod. Narecover sa crime scene ang 20 ka mga basiyo sa gituohang calibre 45. Narecover usab sa lugar ang calibre 45 nga armas nga loaded sa 8 ka mga buhing bala.
Nakigkoordinar usab ang Siocon PNP ngadto na sa duol nga mga establisimyento alang sa posibleng CCTV footage nga makatabang sap ag-ila sa mga suspetsado.
Photo Courtesy: Zanorte Bulletin
