Nanawagan ngayon ang ilang residente mula sa Barangay RH 5 sa Cotabato City sa kanilang mga kabarangay at karatig-lugar na tiyaking may nakakabit na CCTV camera sa bawat bahay. Kasabay nito, ipinapaalala rin nila ang kahalagahan ng palagiang pagsarado at pag-lock ng mga pinto at bintana upang makaiwas sa anumang banta ng pagnanakaw at hindi mapasok ng mga masasamang elemento.
Ang naturang panawagan at paalala ay kasunod ng isang insidente ng pagnanakaw kamakailan kung saan naging biktima ang isang miyembro ng Bureau of Fire Protection (BFP) sa lungsod. Batay sa ulat, naitakbo ng hindi pa nakikilalang magnanakaw ang malaking halaga ng cash at mahahalagang alahas mula sa loob ng tahanan ng naturang pambansang bumbero.
Dahil sa nangyaring insidente, mas pinatindi ng lokal na pulisya sa lungsod ng Cotabato ang kanilang pag-imbestiga. Sa kasalukuyan, may hawak na silang person of interest na posibleng may kinalaman sa nangyaring pasok-bahay.
Patuloy pa rin ang isinasagawang masusing imbestigasyon at paglikom ng mga karagdagang ebidensya ng mga awtoridad upang tuluyang mahuli ang suspek at maibalik ang mga nanakaw na gamit.
