Nakauli na sa Pilipinas ang 14 ka Filipino seafarers gikan sa United Arab Emirates human sa pag-atake sa oil tanker nga MV SIDR sa Strait of Hormuz. Duha usab ka Filipino seafarers ang namatay sa maong insidente.
Gisugdan ang pag-atake niadtong gabii sa Agosto 31, diin naigo ang SIDR sa mga projectile nga wala pa mailhi kung diin gikan. Ang 14 ka seafarers nga wala maangol miuli sakay sa Emirates flight EK334 ug miabot sa Ninoy Aquino International Airport Terminal 3 alas 10 sa gabii niadtong Martes.
Matod ni Migrant Workers Secretary Hans Leo Cacdac, maayo ang kahimtang sa mga seafarers ug nakadawat na sila og pinansyal ug medical assistance gikan sa Department of Migrant Workers (DMW) ug Overseas Workers Welfare Administration (OWWA). Gihikay usab ang hotel accommodation diin ilang mahimamat ang ilang mga pamilya.
Samtang, nagpadayon ang proseso sa pagpauli sa mga patay nga seafarers, uban sa koordinasyon sa Philippine Embassy sa Oman ug Migrant Workers Office sa Dubai.
Giimbestigahan usab sa DMW kung misunod ba sa mga regulasyon sa pag-deploy sa mga Filipino ang ship owner ug manning agency, lakip ang safety measures, risk assessment ug paglikay sa high-risk o warlike areas.
Photo Courtesy: DMW
