Posibleng mosaka ang singil sa kuryente sa mga konsumidor sa Visayas ug Mindanao karong bulana human misaka pag-ayo ang presyo sa kuryente sa spot market, nga hapit moabot sa P20 matag kilowatt-hour (kWh).
Matod sa Independent Electricity Market Operator of the Philippines (IEMOP), misaka og 64.9 porsyento ang presyo sa kuryente sa Wholesale Electricity Spot Market (WESM) sa Visayas ngadto sa P18.59 kada kWh.
Sa Mindanao, miabot kini sa P19.56 kada kWh, o 88 porsyentong pagsaka gikan sa P10.39 kada kWh niaging bulan. Gipasanginlan ang mga outage sa dagkong coal-fired power plants sa maong pagsaka sa presyo, nga nagpugos sa merkado nga mosalig sa mas mahal nga tinubdan sa enerhiya.
Sulod sa pipila ka bulan, nakasinati usab ang Visayas og daghang yellow ug red alerts tungod sa kakulang sa suplay sa kuryente, samtang nag-atubang usab og power crunch ang Mindanao.
Tungod sa pagsaka sa presyo sa Visayas ug Mindanao, misaka ngadto sa P9.29 kada kWh ang WESM systemwide rate gikan sa P8.31 kada kWh. Ang billing period gikan Hulyo 26 hangtod Agosto 25 ug makita sa mga konsumidor ang epekto niini sa ilang bayranan sa kuryente sa Septiyembre.
Photo Courtesy:Vecteezy
