Gideny sa Department of the Interior and Local Government o DILG ang alegasyon ni Vice President Sara Duterte nga gi-harass siya sa mga otoridad may kalabotan sa iyang grave threats case.
Matud ni DILG Secretary Jonvic Remulla, ang mga babayeng pulis nga miadto sa pinuy-anan ug opisina ni Duterte walay gidala nga armas ug gitugotan usab sila nga makasulod sa maong lugar. Giingon ni Remulla nga walay kamatuoran ang alegasyon sa pagpang-harass atol sa pagserbisyo sa mando sa pagdakop.
Nag-post og piyansa si Duterte sa iyang grave threats case sa usa ka korte sa Quezon City niadtong Sabado, usa ka adlaw human gipagawas ang mando sa pagdakop batok kaniya.
Sumala ni Remulla, nahibalo ang mga otoridad kung asa si Duterte niadtong Biyernes sa gabii, apan wala nila pugsa ang pagpatuman sa mando sa pagdakop ug gitagaan siya sa respeto nga angay sa iyang posisyon.
Apan giingon ni Duterte nga ang maong pahayag ni Remulla maoy nagpalig-on sa iyang alegasyon nga gisubay ug gi-harass siya sa Philippine National Police ug ubang ahensya sa gobyerno. Matud ni Remulla, ang impormasyon bahin sa nahimutangan ni Duterte gikan sa mga tawo nga duol kaniya.
Ang grave threats case batok kang Duterte nag-ugat sa iyang pamahayag sa usa ka livestream niadtong Nobyembre 2024, diin giingon niyang nakahikay siya og tawo nga mopatay kang Presidente Ferdinand Marcos Jr., iyang asawa nga si Liza Araneta-Marcos, ug kanhi House Speaker Martin Romualdez kung siya mismo patyon.
Photo Courtesy: Wikipedia
