Interasado United Arab Emirates (UAE) ug Saudi Arabia sa pagtukod og mga oil storage facilities sa Pilipinas, sumala sa Department of Energy (DOE). Matod ni DOE Oil Industry Management Bureau Director Rino Abad, walay gastuon ang gobyerno sa Pilipinas alang sa maong proyekto tungod kay foreign-owned ug commercially operated ang mga pasilidad.
Gilauman sa DOE nga makatabang kini aron dili dali maapektuhan ang Pilipinas kung adunay krisis o problema sa suplay sa lana sa tibuok kalibotan. Apan sumala ni Abad, gusto sa gobyerno nga adunay kasabutan nga maghatag og prayoridad o reserve rights sa Pilipinas aron makakuha og suplay sa lana kung adunay krisis sa global oil supply.
Kung maaprobahan ang plano, target nga makaabot sa 50 milyon ka baril nga lana ang kapasidad sa maong mga oil storage hub. Samtang, nakigkoordinar na ang bag-ong naporma nga Philippine Strategic Petroleum Reserve team sa Saudi Arabia alang sa maong plano.
Gilauman sa DOE nga ang strategic oil storage mahimong dugang nga proteksyon sa nasud batok sa posibleng kakulang sa suplay ug pagtaas sa presyo sa lana panahon sa global nga krisis.
Photo Courtesy: PNA
