Paglaum ang gihatag sa pagkaluwas sa duha ka minero nga siyam ka adlaw na nga na-trap sulod sa hydropower tunnel sa Nepal, human sa grabeng pagbaha ug pagdahili sa yuta.
Naluwas nga buhi sila Sanjay Sah, usa ka mechanical foreman, ug Kabir Maharjan, usa ka mechanical supervisor, human sila nakit-an sa sulod sa tunnel sa Upper Trishuli 3A Hydropower Station sa Rasuwa District. Nadungog sa rescue team ang ilang tingog nga nakatabang sa pagtino sa ilang nahimutangan.
Human makuha gikan sa tunnel, gilayon silang gipailalom sa medical treatment. Ang ilang pagkaluwas, naghatag kini og paglaum sa mga pamilya sa ubang minero nga wala pa makita sukad sa kalamidad niadtong Agusto 26.
Gibanabana nga mokabat sa 900 ka trabahante, ang posibleng na-trap sa mga tunnel sa nagkalain-laing hydropower projects sa dapit sa Trishuli River. Padayon usab ang search and rescue operation, samtang naningkamot ang mga otoridad nga maabot ang mga tunnel nga napuno sa lapok, bato ug debris.
Photo Courtesy: NPR
