Gisiguro sa Department of Agriculture (DA) nga adunay igong pondo ang gobyerno aron ipadayon ang P20-per-kilogram rice program hangtod sa pagtapos sa termino ni Presidente Ferdinand Marcos Jr. sa Hunyo 2028.
Matud ni Agriculture Secretary Francisco Tiu Laurel Jr., dako ang natabang sa programa nga ‘ Benteng Bigas Meron Na” sa mga panimalay nga naapektuhan sa taas nga presyo sa pagkaon.
Apan wala nagplano ang DA nga ipugos sa tibuok kamerkaduhan ang P20 kada kilo nga presyo sa bugas, tungod kay posibleng maapektuhan ang kita sa mga mag-uuma.
Matud sa ahensya, misaka ang gasto sa produksiyon tungod sa mahal nga abono, gasolina ug shipping, nga naapektuhan usab sa gubat sa Ukraine ug tensiyon sa Middle East.
Gilauman usab nga makatabang ang programa sa National Food Authority sa pagpalit og mas daghang humay gikan sa local rice farmers ug daghan pang makabenepisyo sa maong programa.
Photo Courtesy: PNA
