Nasakmit sa mga otoridad ang 80 master cases sa New Berlin cigarettes nga gibanabanang nagkantidad og P4.84 million atol sa seaborne patrol operation sa Yllana Bay, Barangay White Beach, Pagadian City, mga alas-3:45 sa kaadlawon niadtong September 6.
Gipangulohan ang operasyon sa Zamboanga del Sur Maritime Police Station, kauban ang 902nd Maneuver Company RMFB-9, ZDS Provincial Intelligence Team, Zamboanga del Sur Provincial Intelligence Unit, National Intelligence and Security Group, ug Regional Intelligence Division 9, sa koordinasyon sa Pagadian City Police Station.
Nasakmit sa operasyon ang usa ka wooden motorized pump boat nga puno sa kahon sa gituohang sigarilyo nga walay mga BIR tax stamps ug graphic health warning signs. Sa maong operasyon nasikop usab ang duha ka lalaki nga nagpangidaron ug 24 ug 26 anyos nga pulos mga residente sa Picong, Lanao del Sur.
Nakakustudiya na karon ang duha ka mga suspetsado ug mga nakumpiska nga ebidensya sa Zamboanga del Sur Maritime Police Station alang sa hustong disposisyon.
