Giturn-over sa Bureau of Customs–Ninoy Aquino International Airport ngadto sa Philippine Drug Enforcement Agency ang 8 ka abandonadong checked-in luggage nga adunay gibana-banang 94.597 kilos nga gidudahang marijuana o “kush,” nga nagkantidad og P141.895 milyon.
Nadiskubre ang mga iligal nga droga human ipaagi sa PDEA K9 inspection ang mga bagahe sa Interline Baggage Room sa NAIA Terminal 3 sa Pasay City niadtong Septiyembre 1.
Nakita usab ang mga kadudahang hulagway atol sa X-ray screening, hinungdan nga gipailalom kini sa dugang nga pagsusi sa wala pa giturn-over ngadto sa PDEA alang sa hustong pagdumala ug legal nga aksyon.
Matud ni BOC-NAIA District Collector Maria Yasmin Obillos-Mapa, padayon nilang pakusgan ang border control ug koordinasyon sa mga ahensya sa pagpatuman sa balaod aron mapugngan ang pagsulod sa iligal nga droga.
Gipasiugda usab ni Customs Commissioner Ariel Nepomuceno nga magpabiling alerto ang BOC sa pagbantay sa mga pantalan ug tugpahanan batok sa iligal nga droga ug uban pang ginadili nga mga kargamento.
Photo Courtesy: PNA
