Padayon ang inspeksyon sa Digos City Veterinary Office sa mga baboy nga gamiton sa umaabot nga Lechonan sa Kadalanan, kabahin sa selebrasyon sa 26th Araw ng Digos, aron masiguro nga himsog ug luwas kini alang sa publiko.
Matud ni Dr. Niel Richie Lavega, Head sa Digos City Veterinary Office, padayon silang nag-inspeksyon sa mga stockyard sa mga participant sa maong kalihukan.
Dugang ni Dr. Lavega, 44 ka participants na ang nalista ug gi-cut off na ang pagdawat tungod sa limitadong lugar. Kapin 960 ka lechon ang gipaabot, samtang 50 porsyento na sa mga stockyard ang na-inspeksyon ug target nga makompleto kini sa Septiyembre 6.
Mas daghan usab ang participants karong tuiga kumpara sa miaging tuig, apan wala na madawat ang ubang gustong moapas tungod sa kakulang sa lugar.
Gilauman usab ni Dr, Lavega nga mahimong maayo ang panahon atol sa kalihukan, apan padayon ang ilang pagpangandam bisan pa sa posibleng kainit o pag-ulan.
Gikinahanglan nga ipaagi sa slaughterhouse ang tanang baboy aron masiguro nga walay sakit ug luwas ang matag lechon nga ibaligya ug konsumohon sa publiko atol sa selebrasyon.
