Nakatindog sa wheelchair si kanhi Department of Public Works and Highways o DPWH Secretary Manny Bonoan, human gibasura sa Sandiganbayan Fifth Division ang iyang ngalan isip co-accused sa kasong graft ug plunder nga may kalabotan sa giingong anomalya sa flood control projects.
Base sa mando sa Sandiganbayan, gitangtang na si Bonoan sa listahan sa mga akusado sa kaso diin lakip usab si Senator Jinggoy Estrada ug pipila ka mga engineer.
Ang maong kaso nag-ugat sa giingong anomalya sa mga proyekto sa flood control nga mokabat sa kapin P573 milyon, nga giingong kantidad sa mga kickback nga nakolekta gikan sa maong mga proyekto. Gipasaka sa Ombudsman ang kaso batok kang Bonoan, Senator Estrada ug uban pang mga opisyal tungod sa alegasyon sa pagbulsa sa maong kantidad.
Apan human maaresto ug ma-ospital si Bonoan tungod sa iyang seryosong balatian, mihangyo ang Ombudsman nga tangtangon siya isip akusado aron mahimong state witness batok sa ubang mas taas nga opisyal nga posibleng nalambigit sa maong kontrobersiya.
Sa pagkakaron, nagpadayon ang proseso sa kaso batok sa ubang mga akusado.
Photo Courtesy: Philippine News Agency
