Nangayo ang Department of Agriculture o DA og hangtod P125 bilyon nga pondo matag tuig sulod sa unom ka tuig aron matubag ang kakulang sa farm-to-market roads o FMR sa nasud. Base sa DA, mokabat sa P750 bilyon ang gikinahanglang pondo alang sa pagtukod og gibana-banang 55,000 kilometros nga mga dalan sa kabaryohan sulod sa unom ka tuig.
Matud ni Agriculture Secretary Francisco Tiu Laurel Jr., kung gusto nilang mahuman ang maong mga proyekto sulod sa unom ka tuig, gikinahanglan ang P125 bilyon kada tuig, apan limitado gihapon kini sa kapasidad sa national budget. Gihangyo usab sa kalihim ang Senado ug House of Representatives nga tagaan og dugang pondo ang DA alang sa maong programa atol sa bicameral deliberations.
Sa 2027, P16 bilyon lamang ang nakataganang budget sa DA alang sa pagtukod sa farm-to-market roads, mas ubos og 51 porsyento kumpara sa P33 bilyon nga pondo niadtong 2026. Matud pa ni Tiu Laurel, mas realistiko nga hatagan ang DA og P60 hangtod P66 bilyon matag tuig aron mahuman ang kakulang sa farm-to-market roads sulod sa kapin 12 ka tuig.
Gilauman nga magsugod na ang bidding sa mga proyekto karong Septiyembre, samtang posibleng sugdan ang aktuwal nga konstruksyon sa Disyembre ning tuiga. Ang mga proyekto nga ma-bid out karong tuiga gilauman usab nga mahuman sa kataposan sa 2027.
Nahinay ang bidding sa mga farm-to-market road projects human gikuptan sa DA ang construction ug implementation niini gikan sa Department of Public Works and Highways o DPWH.
