Usa ka coffee shop sa Jalandoni Street, Iloilo City ang nakadani sa atensyon tungod sa ilang libre nga Wi-Fi nga padayon gihapong naka-on bisan sirado na ang establisyemento sa gabii.
Human sa closing hours, adunay mga estudyante, trabahante, silingan ug uban pang nanginahanglan og internet nga magtapok sa gawas sa coffee shop aron makagamit sa libre nilang Wi-Fi.
Apan sumala sa tag-iya, dili kini tuyo nga mahimong tigbantay sa ilang establisyemento ang mga tawo nga magtapok sa gawas. Kinahanglan lamang nga magpabiling naka-on ang internet tungod kay konektado kini sa CCTV system sa coffee shop.
Apan tungod kay adunay mga tawo nga kanunay magtambay sa gawas matag gabii, gihimo kining pasi-aw sa tag-iya nga nahimo na usab silang “libre nga security guards” sa establisemento.
Mas nindot pa, dili kinahanglan nga mopalit og kape ang usa ka tawo aron makakuha sa Wi-Fi password. Sukad gibuksan ang coffee shop niadtong 2023, libre ang ilang Wi-Fi ug charging station alang sa mga nanginahanglan.
Para sa pamilya nga nagdumala sa coffee shop, dili lang kini bahin sa paghatag og libreng internet, kundili usa usab ka gamay nga paagi aron makatabang sa ilang mga silingan ug mga estudyante nga nanginahanglan og koneksyon para sa ilang pagtuon, trabaho ug uban pang buluhaton.
Usa kini ka pananglitan nga usahay, ang gamay nga tabang sama sa libre nga Wi-Fi, dako na usab og kahulugan alang sa mga tawo nga nanginahanglan.
