Usa ka Chinese diver nga giila sa apelyido nga Wang, anaa sa peligro human siya mawala samtang nag-diving sa usa ka suba sa Furong Town, Xiangxi, Hunan Province, China. Sumala sa mga report, nahitabo kini, dihang nahimulag si Wang sa iyang kauban ug nasulod sa komplikadong sistema sa mga langob ilalom sa tubig.
Sulod sa lima ka adlaw ug lima ka gabii, nakalahutay si Wang pinaagi sa pagpabilin sa usa ka air pocket o lugar sulod sa langob nga adunay hangin bisan gamay na ang iyang oxygen. Gikataho usab nga nikaon siya og hilaw nga isda samtang naghulat sa morescue kaniya.
Gipangita siya sa mga rescue team ug espesyalistang cave divers. Sa usa sa ilang pagpangita, nakit-an si Wang human siya misinyas gamit ang iyang flashlight samtang nagkaubos na ang iyang suplay sa oxygen.
Malampusong naluwas si Wang ug nakalakaw pa siya padulong sa ambulansya. Apan ang nakapakurat sa mga tigluwas mao ang iyang unang pangutana human siya makagawas sa langob: “Do you have a cigarette?” o “Aduna moy sigarilyo?”
Photo Courtesy: SCMP – SOUTH CHINA
