Gisugyot sa Department of the Interior and Local Government o DILG ang mga lokal nga panggamhanan nga molihok dayon base sa impormasyon ug mga pasidaan sa posibleng kalamidad, aron malikayan ang mas dakong kadaot ug makaluwas og kinabuhi.
Matud sa DILG, dili igo nga makadawat lamang og impormasyon bahin sa umaabot nga hulga, kundili kinahanglan kining hubaron ngadto sa konkretong preparasyon ug anticipatory actions sa mga LGU sa dili pa mahimong emerhensiya ang sitwasyon.
Gipasiugda sa ahensya ang Operation LISTO isip usa sa mga nag-unang programa nga naghatag og giya sa mga LGU sa hustong buhaton sa wala pa, panahon ug human sa kalamidad, lakip ang risk assessment, early warning, preemptive evacuation, koordinasyon ug emergency response.
Gipatin-aw sa DILG nga tumong sa programa nga mapagamay ang kal-ang tali sa pagdawat og disaster warning ug sa aktuwal nga paglihok, aron mas maandam ang mga komunidad ug mas mapanalipdan ang kinabuhi ug kabtangan sa dili pa moabot ang kalamidad.
Photo Courtesy: wikipedia
