Nakarekober ang mga tropa sa 30th Infantry Battalion (30IB), Philippine Army og mga armas ug bala nga giingong gitago sa mga nahibiling miyembro sa New People’s Army (NPA) atol sa operasyon niadtong Huwebes sa Barangay Lobo, Carrascal, Surigao del Sur.
Lakip sa narekober sa tropa ang usa ka M14 rifle, usa ka M1 Garand rifle, lima ka 20-round detachable box magazines, 32 ka bala sa .30-caliber ug 89 ka bala nga 7.62×51 mm.
Matud ni 30IB Commander Lt. Col. Rey Vergel Annogui, ang pagkarekober sa maong mga armas dakong tabang sa pagpahuyang sa kapasidad sa mga nahibiling NPA sa pagpahigayon og armadong kalihokan.
Gipasabot usab ni Annogui nga ang pagkasakmit sa mga armas makatabang sa pagpugong sa posibleng pagbalik sa armadong kagubot sa mga komunidad nga kaniadto naapektuhan sa insurhensiya sa Carrascal ug ubang bahin sa Surigao del Sur.
Matud pa niya, nagpakita ang maong kalampusan sa padayong paningkamot sa mga kasundalohan sa pagpanalipod sa mga komunidad ug pagpreserbar sa kalinaw sa ilang area of responsibility.
Gipahayag ni Annogui nga magpadayon ang 30IB sa ilang mga operasyon aron mapugngan nga magamit pag-usab ang mga armas sa NPA sa pagpanghulga sa mga residente ug pagdisturbo sa kalinaw sa probinsya.
Photo courtesy: 30IB
