Duha ka gituohang drug personalities ang nadakpan sa mga operatiba sa Carrascal Municipal Police Station (MPS) ug Philippine Drug Enforcement Agency (PDEA) Surigao del Sur Field Office atol sa duha ka managlahing buy-bust operation kagahapon, Setyembre 4, 2026. Ang operasyon gipangulohan ni Police Major Elmar R. Claret, Chief of Police sa Carrascal MPS.
Gipahigayon ang unang operasyon pasado alas 11:00 sa buntag sa Purok 4, Barangay Baybay, Carrascal diin nadakpan ang usa ka 26-anyos nga lalaki nga laborer. Nakumpiska gikan sa operasyon ang lima ka heat-sealed transparent plastic sachet nga adunay gituohang shabu, tulo ka plastic sachet nga adunay drug residue, nagkalain-laing drug paraphernalia, ug ang marked money nga gigamit sa buy-bust operation.
Samtang, alas 1:50 hangtod alas 2:20 sa hapon sa maong adlaw, gipahigayon ang laing buy-bust operation sa Purok 5, Barangay Saca, Carrascal diin nadakpan usab ang usa ka 51-anyos nga lalaki nga plumber. Narekober gikan sa suspek ang unom ka heat-sealed transparent plastic sachet nga adunay gituohang shabu, drug paraphernalia, ug marked money.
Gidala ang mga suspek sa Carrascal MPS alang sa booking ug tukmang legal nga proseso may kalabotan sa posibleng paglapas sa Republic Act No. 9165 o Comprehensive Dangerous Drugs Act of 2002.
Photo courtesy: Carrascal MPS
