Gipadayon sa Special Investigation Task Group o SITG Bucol sa kapulisan ang imbestigasyon sa pagpatay kang anhing Kapitan Oscar “Dong” Bucol Jr. sa Tres de Mayo.
Matud ni Jay Caren Bucol, igsoon sa biktima, positibo ang pamilya sa mga bag-ong kalamboan sa kaso, ilabi na sa mga bag-ong ngalan nga karon ginasubay sa kapulisan.
Gipaabot nga sa sunod nga conference karong Septiyembre, ipresentar sa SITG Bucol ang mga persons of interest nga posibleng nalambigit o adunay kahibalo sa krimen.
Matud ni Jay Caren, kontento siya sa paningkamot sa kapulisan, apan dili pa hingpit ang ilang katagbawan tungod kay aduna pa gihapoy mga pangutana nga wala matubag.
Sa iyang panawagan, gihangyo ni Jay Caren ang SITG Bucol ug ang liderato sa Philippine National Police nga ipadayon ang imbestigasyon ug barugan ang kaso alang sa hustisya ni Kapitan Dong.
