Gipaubos sa online classes ang kapin 1.4 milyon ka estudyante sa unom ka probinsya sa Indonesia tungod sa grabeng kalidad sa hangin nga resulta sa forest fires. Hangtod niadtong Setyembre 2, miabot sa 1.43 milyon ka estudyante gikan sa 12,874 ka eskwelahan ang naapektuhan, sumala kang Gogot Suharwoto, usa ka opisyal sa Education Ministry. Lakip sa mga probinsya nga naapektuhan ang Riau, Jambi ug South Sumatra sa Sumatra, ingon man ang West Kalimantan, Central Kalimantan ug South Kalimantan sa Borneo.
Sa 1.43 milyon ka estudyante, kapin 1.1 milyon ang gikan sa West Kalimantan, diin natala ang pinakagrabeng wildfire karong tuiga. Ang remote learning nagsugod niadtong Agosto 31 ug gikatakdang molungtad hangtod Setyembre 4, apan susihon matag tulo ka adlaw kung kinahanglan ba kining palawigon. Sa Kalimantan, daghang lugar ang nakarekord og air pollution readings nga milapas sa 200, samtang ang uban miabot pa sa kapin 1,000. Pinakagrabe ang kahimtang sa Southeast Pontianak sa West Kalimantan diin miabot sa 1,023 ang pollution reading. Ang reading nga padayon nga molapas sa 300 giisip nang “hazardous.”
Matud ni Gogot, gitugotan ang mga school principal nga mohimo dayon og aksyon kung adunay emerhensya ug dili na kinahanglan maghulat pa nga mograbe ang kahimtang. Base sa datos sa Forestry Ministry, kapin 200,000 ka ektarya sa yuta ang nasunog tungod sa wildfire sa unang pito ka bulan ning tuiga, ug midoble pa kini niadtong Hulyo. Sa unom ka priority provinces, 73,310 ka ektarya sa yuta ang naapektuhan sa wildfire.
Photo courtesy: South China Morning Post
