Gilauman nga mas molig-on pa ug mahimong “very strong” ang El Niño sa umaabot nga mga bulan, sumala sa pahimangno sa World Meteorological Organization (WMO) sa United Nations.
Matud sa WMO, gilauman nga magpadayon ang maong weather phenomenon hangtod Pebrero, nga mahimong magdala og dakong kausaban sa pattern sa ulan ug temperatura sa nagkalain-laing bahin sa kalibotan. Nagpasidaan ang WMO nga posibleng mosangpot kini sa baha, grabeng hulaw ug grabi nga kainit, depende sa lugar nga maapektuhan.
Sumala ni UN Secretary-General António Guterres, ang El Niño makadugang pa sa kainit sa kalibotan nga nag-atubang na sa mga epekto sa climate change. Gipahayag usab ni WMO Chief Celeste Saulo nga ang mas kusog nga El Niño mahimong adunay dakong epekto sa pandaigdigang ekonomiya, agrikultura ug panglawas.
Tungod niini, giawhag sa United Nations ang tanang nasud nga mangandam na daan aron maminusan ang posibleng kadaot sa mga komunidad nga mahimong maapektuhan sa grabeng kainit, hulaw ug baha.
Photo courtesy: Reuters
