Nadakpan sa kapulisan ang usa ka 57 anyos nga lalaki sa gipahigayong anti-smuggling operation batok sa iligal, walay dokumento ug smuggled nga sigarilyo sa Barangay Tina, San Miguel, Surigao del Sur niadtong Septiyembre 2, 2026. Gipangulohan ang operasyon sa mga personnel sa Intelligence Section sa San Miguel Municipal Police Station ubos sa pagdumala ni PMAJ Joemel L. Maquiling, Chief of Police.
Giila sa kapulisan ang nadakpang suspek pinaagi sa alyas nga “Pogi,” 57 anyos, ulitawo ug residente sa Purok Rising Sun, Barangay Bag-ong Lungsod, Tandag City, Surigao del Sur.
Nasakmit gikan sa suspek ang mosunod nga mga sigarilyo:1 ream nga Cannon Menthol Cigarettes;3 reams nga Champion Cigarettes;2 reams nga Black Hawk Cigarettes; 4 reams nga Casa Blanca Cigarettes. Mokabat sa 10 ka reams sa giingong counterfeit cigarettes ang nakumpiska, nga adunay gibanabanang kinatibuk-ang market value nga P5,000.
Ang suspek ug ang nakumpiskang mga sigarilyo anaa karon sa kustodiya sa San Miguel MPS alang sa hustong disposisyon. Samtang, giandam na sa kapulisan ang pagsang-at og kaso batok sa suspek tungod sa giingong paglapas sa Republic Act No. 10643 o Graphic Health Warning Law.
Photo courtesy: PNP San Miguel Municipal Police Station
