Gipahibalo sa mga opisyal nga base sa ilang datos nga nakuha, nagpadayon ang pagsaka sa ihap sa Ebola sa Democratic Republic of Congo kun DRC, diin milapas na ngadto sa 6,000 ang kumpirmadong mga kaso ug miabot na sab sa 2,911 ang mga namatay.
Ang maong kahimtang naghatag na ug dakong kabalaka sa kadaghanan, ilabina kay paspas ang pagkaylap niini kumpara sa pagpaningkamot aron mapugngan ang maong outbreak.
Sumala pa sa report nga muabot na sa dul-an 60 ka health zones ang naapektuhan ug matag semana adunay mga bag-ong lugar nga nadugang sa listahan. Gikataho usab nga kusog ang pagkuyanap sa sakit gumikan ang uban musupak sa mga regulasyon nga gipatuman.
Tungod sa pagkaylap sa maong sakit, ang mga response team naglisod sa pag-abot sa pipila ka apektadong komunidad aron maghatag og medikal nga serbisyo ug uban pang kinahanglanon. Gani, nagpasidaan usab ang gobyerno nga daghan pa ang mawad-an sa kinabuhi kung dili dayon makontrol ang outbreak.
Matod pa ni UN Secretary-General Antonio Guterres, ang maong outbreak mao ang pinakapaspas nga mikaylap nga epidemya sa Ebola sa kasaysayan. Bisan pa niini, gipasiugda ni Guterres nga posible gihapon kining mapugngan kung mapakusgan ang mga paningkamot sa pagtubag sa outbreak. Kalabot niini, nanawagan usab ang United Nations alang sa dugang nga pondo aron nga malikayan pa ang pagkuyanao sa maong sakit.
Photo Courtesy: Al Jazeera
