Nasikop sa kapulisan ang usa ka 28-anyos nga laborer atol sa operasyon batok sa ilegal nga sugal o mas nailhan nga Hantak didto sa Barangay Santiago, Caraga, Davao Oriental niadtong Septyembre 1, 2026. Ang dinakpan giila lamang sa alyas nga “Nog,” ulitawo ug residente sa Purok Sampalok, Barangay Santiago sa maong munisipyo.
Base sa report sa Caraga Municipal Police Station, nakadawat sila ug tawag gikan sa usa ka concerned citizen banda alas 5:30 sa buntag sa maong adlaw nga giingong nagpadayon ang ilegal nga operasyon sa maong lugar.
Sa pagresponde sa kapulisan, daling miikyas ang mga nagdula ug Cara y Cruz, apan napugngan si alyas “Nog ug narekober gikan kaniya ang duha ka sensilyo nga nagkantidad og dos pesos, tulo ka piraso sa P100, ug usa ka lingin nga bato nga giingong gigamit sa maong sugal.
Human sa pagdakop gipasabot ang akusado sa rason iyang mga katungod ubos sa Konstitusyon pinaagi sa pinulongan nga iyang nasabtan ug nahibal-an. Sa pagkakaron ang dinakpan anaa na sa kustodiya sa Caraga Municipal Police Station alang sa tukmang disposisyon ug mag atubang sa kasong paglapas sa Presidential Decree 1602, nga giamendaran sa Republic Act 9287 kun Anti-Illegal Numbers Games Law.
Photo Courtesy: Caraga Municipal Police Station
