Namatay ang duha ka Filipino seafarer human giatake ang Saudi-flagged oil tanker nga SIDR samtang nagbiyahe sa Strait of Hormuz niadtong Lunes sa gabii. Sumala sa Department of Migrant Workers o DMW, 16 ka Filipino seafarer ang sakay sa barko sa dihang naigo kini sa wala pa mailhing mga projectile nga maoy hinungdan sa sunog.
Nakontrol sa mga tripulante ang kalayo, apan duha kanila ang namatay samtang 14 ang naluwas ug wala maangol. Ang mga biktima gidala na sa Oman, diin nakig-coordinate ang Philippine Embassy ug Migrant Workers Office alang sa pagpauli sa mga survivor ug pag-repatriate sa mga patay.
Matod ni Migrant Workers Secretary Hans Leo Cacdac, tabangan usab sa gobyerno ang mga pamilya sa mga namatay nga seafarer. Gipabiling red alert sa DMW ang Strait of Hormuz ug gihangyo ang mga shipowner nga likayan ang maong high-risk area kon mahimo.
Gipahinumdoman usab ang mga seafarer nga adunay katungod sa pagdumili sa paglawig sa peligrosong ruta.
Photo Courtesy: x.com
