Nikunhod og 50 porsyento ang populasyon sa dugong sa Gulf of Carpentaria sa amihanang Australia, base sa survey sa mga tigdukiduki. Gibanabana nga mokabat sa 10 mil ang dugong sa tibuok gulf niadtong 2007, apan mikunhod kini ngadto sa mga 5 mil sa 2025.
Sa aktuwal nga ihap, 305 ka dugong ang nakita sa survey niadtong 2025, kumpara sa 471 niadtong 2007. Labing dako ang pagkunhod sa Queensland, diin 63 na lang ang na-record kumpara sa 231 kaniadto.
Matod sa mga siyentista, makapabalaka kini tungod kay ang dugong dugay mabuhi apan hinay ang pagpanganak ug pagkab-ot sa reproductive maturity, busa dugay usab ang ilang recovery.
Wala pa matino ang eksaktong hinungdan sa pagkunhod, apan nakita usab ang dakong pagkunhod sa seagrass meadow nga mao ang pangunang pagkaon sa dugong. Gituohang nakaapekto usab ang commercial gill-net fishing, hinungdan nga gisuspenso na kini sa pipila ka bahin sa Gulf of Carpentaria.
Photo Courtesy: Times Indonesia
