Gisugdan sa Sitio Madaja, Barangay Buenavista, Himamaylan City ang usa ka tuig nga proyekto alang sa pagpalambo sa panginabuhian, nutrisyon, disaster preparedness, ug access sa siyensya ug teknolohiya.
Gilunsad kini sa Hope Builders Organization Negros Island Inc. o HBONI niadtong Agosto 30, uban sa suporta ug pondo sa Department of Science and Technology o DOST pinaagi sa Community Empowerment through Science and Technology o CEST Program. Molungtad ang proyekto hangtod Agosto 2027.
Lakip sa unang mga kalihokan ang entrepreneurial training alang sa 15 ka miyembro sa Madaja Handweavers Association, first-aid ug disaster preparedness training alang sa 15 ka Bantay Gubat volunteers, ug paghatag og mga liso sa kalabasa, talong ug sibuyas nga dahon ngadto sa 30 ka mag-uuma.
Makadawat usab ang mga weavers og tikog flattening machine ug solar power system aron mapadali ang ilang paghahabol. Samtang, 80 ka undernourished pupils sa Madaja Elementary School ang makadawat og nutrition interventions, lakip ang complementary food products ug ready-to-eat meals.
Dugang pa, 109 ka estudyante ang maapil sa science and technology activities pinaagi sa E-CHIR Program, samtang hatagan ang eskwelahan og rainwater collection system. Gisuportahan usab sa 94th Infantry Battalion, DENR-CENRO Kabankalan, Barangay Buenavista ug Himamaylan City LGU ang proyekto aron mapalambo ang panginabuhian, edukasyon, kahimsog, disaster preparedness ug pagpanalipod sa kinaiyahan.
Photo Courtesy: NEGOR DAILY BULLETIN
