Padayon nga gibantayan sa mga awtoridad ang haze o aso nga gikan sa sunog sa kalasangan sa Kalimantan, Indonesia, nga gidala sa hangin paingon sa Pilipinas.
Sumala sa DENR-Environmental Management Bureau (DENR-EMB), hangtod Setyembre 2, 2026, adunay walo ka lugar sa Luzon, Visayas ug Mindanao nga nakarekord og dili maayong kalidad sa hangin. Ang Talisay City sa Cebu ug Cagayan de Oro City nakaabot sa lebel nga “acutely unhealthy.”
Sa Mindanao, apil sa mga lugar nga naka-monitor og “unhealthy for sensitive groups” ang Calinan sa Davao City ug Koronadal City, samtang ang San Ramon area sa Zamboanga City gi-classify nga “very unhealthy.”
Gipatin-aw sa DENR-EMB nga ang haze posibleng resulta sa aso ug gagmay nga partikulo gikan sa mga sunog sa Kalimantan nga gidala sa hangin paingon sa Pilipinas.
Samtang sa pikas bahin, giingon sa PAGASA nga ang habagat maoy nakatabang sa pagdala sa haze ngadto sa kasadpang bahin sa nasud, lakip ang pipila ka dapit sa Visayas ug Mindanao.
Apan adunay pag-uswag sa kalidad sa hangin sa pipila ka lugar sa Metro Manila niadtong Setyembre 2 tungod sa pag-usab sa direksiyon niini.
Gilauman sa DENR-EMB nga mahimong magpadayon ang haze hangtod karong adlawa Setyembre 3, apan posibleng mouswag ang kahimtang gikan Setyembre 4 hangtod 6 kung magpadayon ang kalapad sa pag-ulan ug mausab ang pattern sa hangin.
Photo Courtesy: Philippine News Agency
