Posibleng dili una maka export ang Pilipinas og asukal ngadto sa Estados Unidos karong tuiga tungod sa kakulang sa suplay sa tubo ug dili igo nga lokal nga produksyon niini.
Sumala sa Sugar Regulatory Administration (SRA), mahimong dili matuman sa Pilipinas ang sugar export quota alang sa Estados Unidos tungod kay kulang ang domestic production aron matubag ang panginahanglan sa lokal nga merkado ug ang gitakdang export allocation.
Matud ni SRA Administrator ug Chief Executive Officer Pablo Luis Azcona, dili pa igo ang produksiyon sa asukal sa nasud aron mahatagan usab og igo nga suplay ang export market sa US. Dugang pa, naapektuhan ang mga plantasyon sa tubo sa miaging tuig tungod sa grabeng pagbaha nga miigo sa daghang sugar-producing areas. Tungod niini, mikunhod ang produksyon sa tubo nga maoy pangunang hilaw nga materyales sa paghimo og asukal.
Gikabalak-an usab sa SRA ang posibleng dugang nga epekto sa El Niño sa produksyon sa tubo. Ang taas nga kainit ug kakulang sa tubig mahimong makaapekto sa pagtubo ug ani sa mga sugarcane plantation.
Kahinumdoman nga niadtong 2021–2022 ug 2022–2023 milling seasons, wala usab makahatag ang Pilipinas og igo nga asukal alang sa export quota ngadto sa Estados Unidos tungod sa kakulang sa domestic production.
Sa pagkakaron, wala pa hingpit nga napinal sa SRA kung ipadayon ba ang pag-export sa asukal ngadto sa US karong tuiga.
Gipasiugda usab nga prayoridad ang pagsiguro sa igo nga suplay sa asukal alang sa lokal nga panginahanglan sa dili pa magdesisyon bahin sa export.
Photo courtesy: PNA
