Nibalik na sa normal ang operasyon sa suplay sa tubig sa tibuok Tagum City human masulbad ang electrical problem nga nakaapekto sa operasyon sa Tagum Water Company, Incorporated (TWCI). Sumala sa Tagum Water District (TWD), mibalik ang suplay sa tubig alas-11:44 karong buntag September 2, 2026.
Bisan pa niini, gipaabot sa TWD nga adunay pipila ka mga lugar nga makasinati gihapon og ubos nga water pressure samtang hinay-hinay nga nagabalik sa normal ang pressure sa sistema.
Gipasidan-an usab ang mga konsumante nga posibleng makasinati og temporaryong pagkadiskolor sa tubig tungod sa mga kausaban sa water pressure atol sa proseso sa pag-normalize sa suplay.
Gipangayo sa TWD ang pagsabot ug pailub sa mga konsumante alang sa mga kalisdanan nga ilang nasinati atol sa water service interruption.
Alang sa mga konsumante nga makasinati gihapon og walay tubig o pagkadiskolor sa tubig, mahimo silang mokontak sa Tagum Water District pinaagi sa 0963-341-9162 o (084) 216-6628. Mahimo usab silang magpadala og mensahe sa opisyal nga Facebook page sa Tagum Water District – TWD.
Padayon usab ang paningkamot sa TWD aron maseguro ang luwas, lig-on, ug kasaligan nga serbisyo sa tubig alang sa mga residente sa Tagum City.
Photo Courtesy: Tagum Water District
