Patay ang usa ka abogado ug bise-presidente sa Bank of America human kini gidunggab sa usa ka giingong random ug walay hinungdan nga pag-atake sa Manhattan, New York.
Ang biktima giila nga si Erin Piacenti, residente sa New Jersey, nga nagtrabaho sa Global Corporate and Investment Banking Division sa Bank of America.
Nahitabo ang insidente pasado alas-4 sa hapon niadtong Lunes, Agosto 31, 2026 duol sa West 42nd Street ug Seventh Avenue, usa sa mga lugar nga daghang tawo sa Manhattan ug duol sa Times Square.
Sumala sa kapolisan, duha ka tawo ang giatake, si Piacenti gidala sa Bellevue Hospital alang sa dinaliang medikal nga atensyon, apan wala na maluwas tungod sa iyang mga samad nga naangkon, ang ikaduhang biktima, usa ka 68-anyos nga lalaki, kinsa naluwas sa pag-atake ug gidala usab sa ospital.
Giila sa kapolisan ang suspek nga si Pamela Cisneros, 49-anyos, residente sa Queens. Matud sa mga imbestigador, nagdala si Cisneros og duha ka dagkong kutsilyo sulod sa usa ka shopping bag ug sa walay igong rason kalit giatake ang duha ka biktima.
Human sa hitabo, gikompronta matod pa sa mga pulis si Cisneros duol sa nahitaboan og balik-balik siyang gimandoan sa mga opisyal nga ihulog ang mga kutsilyo ug gisulayan siya nga pugngan gamit ang Taser apan, nagpadayon kini sa pagduol ngadto sa mga opisyal samtang nagkupot og hinagiban, rason nga mipabuto ug armas ang mga pulis ug namatay ang suspek sa maong lugar.
Samtang, gipahayag sa Bank of America ang ilang kaguol ug kasubo sa pagkamatay ni Piacenti ug nakigtambayayong sa mga otoridad sa imbestigasyon.
Photo Courtesy: instagram@ignite
