Nagpadayon ang Barangay Upper Katungal sa Syudad sang Tacurong sa pagtinguha nga makakuha sang pinakamataas nga pagkilala sa Barangay Justice sa pungsod. Ini matapos ginpatigayon ang National On-Site Validation para sa 2026 Lupong Tagapamayapa Incentives Awards ukon LTIA sang Setyembre 1, 2026.
Ginpangunahan sang National Board of Judges, kaupod ang Department of the Interior and Local Government ukon DILG, ang validation sa barangay. Kabahin sang assessment ang pagpresentar sang mga nahimo sang Upper Katungal pinaagi sa audio-visual report, kag pag-usisa sang ila mga rekord, programa kag best practices sa pagresolbar sang mga away sa komunidad.
Ginpasalamatan naman ni City Mayor Lina O. Montilla ang mga miyembro sang Lupong Tagapamayapa sa ila padayon nga pagserbisyo para sa malinong nga pagresolbar sang mga conflict sa barangay. Suno sa DILG, importante ang nasambit nga pagkilala sa mga barangay nga nagapakita sang epektibo kag accessible nga community-based justice.
Ang LTIA isa ka national program nga nagahatag sang awards sa mga barangay nga may outstanding performance sa pagpatuman sang Katarungang Pambarangay System.
Photo Courtesy: City Government of Tacurong
