Magpatuman ang Department of Education (DepEd) og mas istriktong silot batok sa mga estudyanteng nalambigit sa seryosong bullying, pisikal nga pagpanghasi, ug uban pang binuhatan nga makapameligro sa kaluwasan sulod sa eskwelahan. Gilakip kini sa DepEd Order No. 006, s. 2026, o Guidelines on Ensuring a Safe and Motivating Learning Environment (ESMLE), nga nagtakda og nagkalain-laing silot depende sa kabug-at ug balik-balik nga paglapas.
Alang sa mga serious offenses, sama sa balik-balik nga bullying ug online harassment, mahimong suspindihon hangtod lima ka adlaw ug i-refer sa Department of Social Welfare and Development o DSWD sa unang paglapas. Sa ikaduhang paglapas, mahimo kining mosangpot sa non-readmission, samtang exclusion naman sa ikatulong paglapas. Alang sa high-risk acts sama sa grabeng pisikal nga pagpanghasi, bomb threat, ug delikadong hoaxes, mahimong ipatuman ang non-readmission sa unang paglapas, permanenteng exclusion sa ikaduha, ug referral ngadto sa mga awtoridad.
Matud ni Education Secretary Sonny Angara, dili ikompromiso sa DepEd ang kaluwasan sa mga estudyante bisan pa og gihatagan og higayon ang mga nakalapas nga mausab ang ilang pamatasan. Samtang, mahimong magpatuman ang school head og hangtod 30 ka adlaw nga preventive suspension samtang giimbestigahan ang kaso, ilabi na kung ang estudyante giisip nga padayon nga hulga sa kaluwasan sulod sa campus.
Photo courtesy: VOI
