Bisan sa grabeng kakapoy, nakakuha gihapon og silver medal ang Philippine pole vault star nga si EJ Obiena human malampasan ang 5.75 metros sa kompetisyon sa Germany. Matud ni Obiena, lisod ug kapoy ang kompetisyon human sa unom ka events sulod lang sa 14 ka adlaw.
Nakuha sa Frenchman nga si Robin Emig ang gold medal pinaagi sa 5.80 metros. Misulay si Obiena nga iligon ang bulawan pinaagi sa 5.85-meter attempt, apan napakyas siya. Ang American nga si Cole Walsh nakakuha sa bronze human makalampas sa 5.70 metros.
Bisan silver lamang, positibo gihapon kini nga resulta alang kang Obiena tungod sa iyang sunod-sunod nga kompetisyon sukad Agosto 17. Nakakuha siya og duha ka gold medals sa Poland ug ISTAF Berlin, diin iyang nakuha ang iyang ikasiyam nga titulo karong tuiga. Sa poland, nakarekord siya og season-best nga 5.91 metros, duol sa iyang career-high nga 6.00 metros.
Photo courtesy: EJ Obiena/ Facebook
