Kung kasagaran nga Valentine’s Day, bulak, tsokolate o pahumot ang regalo sa bana sa asawa, lahi gyud ning 34-anyos nga Thai nga si Mr. Vall—kay ang iyang gihatag nga regalo, dili malaya, dili mahurot, ug lisod na kaayong iuli!
Para sa ilang ikawalong anibersaryo sa kaminyoon, gipatattoo ni Vall sa iyang forearm ang tibuok nilang marriage certificate—kompleto pa gyud sa floral frame ug selyo!
Ug dili ni basta-basta nga tattoo. Walo ka oras siyang naglingkod sa tattoo chair aron makumpleto ang dokumento sa iyang bukton. Matud ni Vall, kung mag-away sila sa iyang asawa, iyang tan-awon ang tattoo aron makahinumdom sa panahon nga grabe pa ang ilang gugma ug moubos ang iyang ego.
Nakuratan man gamay ang iyang asawa, pero gidawat gihapon ang regalo isip pamatuod sa iyang gugma ug respeto. Pero naa gyuy usa ka pangutana: Kung magbulag sila, unsaon kaha pagpa-cancel sa marriage certificate?
Kay kung papel pa, pwedeng gision. Pero kung tattoo na sa bukton. Murag kinahanglan pa gyud og abogado, dermatologist ug tattoo removal specialist!
Mao nga sa mga bana diha, kung gusto mo og permanenteng regalo sa inyong asawa, siguroha lang una nga permanenteng pud inyong gugma—kay basin ang tattoo magpabilin, pero ang kaminyoon dili.
Photo courtesy: Oddity Central
