Pamub-an sa gobyerno sa Thailand sulod sa 30 ka adlaw na lamang ang visa-free stay para sa mga turista gikan sa sobra 90 ka nasud ug teritoryo epektibo sa Setyembre 15, 2026.
Sumala sa Department of Consular Affairs sa Thailand, kabahin kini sa halapad nga kabag-ohan sa ilang visa exemption ug Visa on Arrival schemes, kung diin sakop sa maong polisiya ang mga nagagikan sa Estados Unidos, China, ug 27 ka miyembrong bansa sa European Union nga kaniadto nakapahimulos hangtod 60 ka adlaw nga pagpuyo.
Gihimo sa gobyerno sa Thailand ang maong desisyon aron mapugngan ang pag-abuso sa visa system ug matubag ang mga nagkataas nga isyu sa kriminalidad. Giila sa mga otoridad ang mga natalang kaso nga naglambigit sa mga langyaw sama sa illegal drug trade, human trafficking, ug pagpadagan sa mga negosyo nga walay saktong permit.
Hinuon, adunay pipila ka nasod sama sa Peru, Brazil, ug South Korea ang hatagan sa mas taas nga 90 ka adlaw nga visa-free stay gikan sa ilang kanhing 60 ka adlaw.
Photo Courtesy: Visasupdate
