Nakaplagan ang 58-anyos nga lalaki nga wala na’y kinabuhi sulod sa iyang balay sa Zone 2, Barangay Kinawe, Libona, Bukidnon sa buntag sa Agosto 31, 2026.
Sumala sa report sa Libona Municipal Police Station, nakadawat sila og tawag gikan sa LGU-Libona gikan sa silingan sa biktima nga nakadiskubre sa maong hitabo sa dihang gisusi ang balay tungod sa wala paggawas niini sukwahi sa iyang naandan nga adlaw-adlaw nga gimbuhaton.
Pag-abot sa kapolisan nga gipangulohan ni PCPT Erwin James Tabequero, ilang nakita ang biktima nga nagbuy-od na sa salog atbang sa abuhan ug adunay duha ka agi sa dugo nga naggikan sa iyang ilong ug baba. Nasayran sa dugang nga imbestigasyon nga ang biktima nag-antos diay sa sakit nga pneumonia ug diabetes ug nag-intake usab og mga maintenance nga tambal batok sa maong mga sakit.
Walay nakita usab nga timailhan sa “foul play” ang mga otoridad sa dapit tungod kay kompleto ug wala hilabti ang mga personal nga kagamitan sa biktima. Gikumpirma sa Rural Health Physician sa RHU-Libona ang natural nga kamatayon sa biktima ug gitugyan na sa iyang pamilya para sa pormal nga pagpalubong.
Photo Courtesy: Libona Municipal Police Station
